Kölle op Kölsch » Kölle Alaaf!

Kölle Alaaf!

Wollt Ehr ald emmer ens wesse, wie dat es met dr fünfte Johreszick?
Mer verzällen Üch, wie et fröher wor. Vum römische „carrus navalis“ üvver dat meddelalderliche „carne vale“ bes zom Fastelovend hückzodags. Aldermaat, Jözenich un Rude-Funke-Plätzje, all spille se en Roll em Fastelovend.
Mer zeijen Üch och e paar Stelle, die Ehr noch nit jekannt hat ov Ehr jar nit jewoss hat, dat die jet mem Fastelovend zo dun han. Mer verroden Üch och, wie dat jekumme es, dat et wäjen ner Krun Knies en ner Fastelovendsjesellschaff jejovven hät und wie de Fraulück ene Plaaz em Rusemondagszog jekräje han.
Wann Ehr uns Bescheid saht, dann jon mer met Üch och en de Südstadt.